kassa_ogrusu_03

Bakıda generalın seyfini oğurladı, pulun yerini isə demir

Bir neçə gün əvvəl Bakıda fəaliyyət göstərən tanınmış şirkət talan olunub.

Xətai rayonu ərazisində yerləşən “Qaraçay” təmir-tikinti şirkətindən içərisində 60.000 ABŞ dolları və sənəd olan seyf oğurlanıb.

Bakı Şəhər Baş Polis İdarəsinin Cinayət Axtarış İdarəsi, Təhlükəsiz Şəhər Xidməti və Xətai Rayon Polis İdarəsi əməkdaşlarının həyata keçirdikləri əməliyyat-axtarış tədbirləri nəticəsində seyfi oğurlayan şəxslərdən biri artıq tutulub. Həmin şəxs Azad Həziyevdir. İlkin məlumata görə, A.Həziyev Bakıya rayonlardan birindən işləməyə gəlib. Əvvəllər də məhz “Qaraçay” şirkətində çalışıb. Avqustun 2-də şirkətin qapısını açaraq içəri girib.

New.Az-ın əldə etdiyi məlumata görə, A.Həziyev cinayəti tək törətməyib. Dəstə üzvləri şirkətdən seyfi oğurlayaraq gizlin yerə aparıb, sonra isə sındırıblar. İçərisində olan pulları isə öz aralarında bölüblər.
İstintaqa ifadə verən A.Həziyev seyfin yerini polislərə desə də, 60.000 dollar pulun yerini deməyib.

Onu da əlavə edək ki, “Qaraçay” şirkətinin yüksək vəzifədə çalışan generala məxsus olduğu iddia olunur. “Qaraçay Holdinq”in fəaliyyət dairəsinə kənd təsərrüfatı, inşaat və kənd təsərrüfatı texnikasının satışı, atçılıq idmanı və digər sahələr daxildir.

10-a yaxın şirkətdən ibarət “Qaraçay Holdinq” Azərbaycanın 18 nazirliyi və bir çox hökumət orqanları ilə əməkdaşlıq edir.

Holdinqin tərkibinə “Garachay Construction” (tikinti, layihələndirmə, dizayn və s.), “Original motors” (inşaat və kənd təsərrüfatı texnikasının satışı), “Turyancay Fermer” (postsovet məkanda ən iri fermalardan biri kimi tanınan maldarlıq ferması – burada 3000-dən çox mal-qara mövcuddur, burada, həmçinin 10 hektar sahə meyvə, giləmeyvə, tərəvəz və s. bitkilərin yetişdirilməsi üçün istixananın yaradılması, süd istehsalı nəzərdə tutulub), “Beyaz” (özəl sifarışlərin icra olunması ilə məşğul olan tikinti şirkəti), “Arzu” atçılıq klubu (müxtəlif cinsli, sayı 50-yə yaxın atın bəsləndiyi atçılıq klubu), “Garachay Asfalt” (öz yolbasanları və asfaltadüzənləri olan asfalt zavodu), “Garachay beton” (beton pompaları, özüboşaldanları və s. olan müxtəlif markalarda betonun istehsalı üçün 4 beton zavodu) daxildir.
Holdinqə daxil olan “Garachay Construction” Azərbaycan ərazisində ən iri inşaat şirkətlərindən biridir. Şirkət fəaliyyətə 2000-ci ildən başlayıb. 2000-ci ilin əvvəlindən indiyə qədər şirkət mürəkkəbliyi müxtəlif olan 500-dən çox layihəni yerinə yetirib. Şirkət tək Azərbaycanda yox, Qazaxıstan, Türkiyə, Mərakeş və s. kimi ölkələrdə fəaliyyət göstərir.
Şirkət “Sərhədçi” İdman Olimpiya Kompleksi, ədliyyə və muzey binalarını, Gəncə və Bərdədə Müalicə və Diaqnostika Mərkəzlərini inşa edib, hazırda isə Səfərbərlik və Hərbi Xidmətə Çağırış üzrə Dövlət Xidməti, Dövlət Miqrasiya Xidmətinin, Sərhəd Xidmətinin yeni hospitalını və s. inzibati binaları tikir.

 

www.new.az